ایم کیو ایم پاکستان کے سربراہ ڈاکٹر خالد مقبول صدیقی نے کہا ہے کہ خود مختار صوبوں کا مطالبہ کرتے رہیں گے، ایم کیو ایم بکھر نہیں نکھر رہی ہے
وزیراعظم اپنے وعدوں کی تکمیل کریں، جب انصاف ہوگا تو امن و خوشحالی ہوگی،صوبوں کی خود مختاری سے زیادہ اہم عوام کو بااختیار بنانا ہے،سربراہ ایم کیو ایم پاکستان
ایم کیو ایم پاکستان کے سربراہ ڈاکٹر خالد مقبول صدیقی نے کہا ہے کہ خود مختارصوبوں کا مطالبہ کرتے رہیں گے،ایم کیو ایم بکھرنہیں نکھر رہی ہے۔حیدرآباد میں جلسے سے خطاب کرتے ہوئے ڈاکٹرخالد مقبول صدیقی نے کہا کہ وزیراعظم اپنے وعدوں کی تکمیل کریں،جب انصاف ہوگا تو امن و خوشحالی ہوگی،انہوں نے کہا کہ صوبوں کو اختیار مل گیا، صوبوں سے بلدیاتی اداروں کو اختیارات نہیں ملے، پاکستان کی یکجہتی کے لیے صوبائی خود مختاری ضروری ہے، صوبوں کی خود مختاری سے زیادہ اہم عوام کو بااختیار بنانا ہے۔خواجہ اظہار الحسن نے جلسے سے خطاب کرتے ہوئے کہا کہ ایم کیو ایم پاکستان پورے پاکستان میں الیکشن سماں بنانے کی کوشش اور جلسے کررہی ہے،پاکستان میں ایک پارٹی ہر پندرہ دن بعد اپنے ہونے کا احساس دلا رہی ہے۔انہوں نے کہا کہ ہم نے پانچ سال پہلے کہا تھا ، دیے سب کے بجھیں گے ہوا کسی کی نہیں‘ ہم نے پانچ سال پہلے کہا تھا جو ظلم ہمارے ساتھ ہوا کسی اور کے ساتھ ہوتا تو اس کا نام و نشان نہ ہوتا، ایم کیو ایم کے خلاف حیدرآباد میں بڑی سازشیں کی گئیں۔خواجہ اظہار نے کہا کہ جو کہتے تھے مہاجر پہلے پاکستانی بنیں انہیں بتانا چاہتا ہوں ہم سے زیادہ اس سرزمین میں کوئی پاکستانی نہیں، مہاجر اس سرزمین کے سب سے بڑے پاکستانی ہیں۔انہوں نے کہا کہ مہاجروں کے اتحاد کو ختم کرنے والی ہر سازش کو ناکام بنائیں گے، ہم نے وفاقی حکومت سے مشروط اتحاد رکھا ہے، شہر کی ترقی اور مسائل حکومت کے سامنے رکھے ہیں۔
POST A COMMENT.